Anse-Boileau
Koman en zenn e en zanfan Sesel mon’n touzour fasinen par sa devlopman e transformasyon pozitiv dan lavi politik Sesel. Mon parkour koman en profesyonnel dan domenn ledikasyon sirtou Ledikasyon Personnel e Sosyal (PSE) in donn mwan tou sa bagaz pour ede anmenn sa transformasyon pozitiv ki nou ti a swete vwar dan nou sosyete.
Alors pour deside zwenn lasenn politik i en desizyon brav ki mon’n pran akoz mon senserman krwar ki mon annan en rol kle pour zwe pour kontinyen promouvwar bann prensip fondamantal Parti Lepep ki fonde lo legalite e lazistis sosyal. Mon prepare pour aport mon kontribisyon e ed pei fer fas avek bann diferan defi, tel ki konbat bann fleo sosyal e promot sa zefor kontinnyel pour anbelir nou lekonomi. Mon pou siport tou demars ki pou anmenn byennet e boner tou Seselwa ler bann deba i ganny fer dan Lasanble Nasyonal. Kot keksoz i mal mon pa pou ezite kritike, me dan en lespri konstriktiv.
Mon egalman krwar ki mon annan tou sa potansyel e determinasyon pour vin sa lider ki pare pour travay avek tou zabitan mon distrik e lezot partner e ansanm eksplor tou posibilite pour fer kiAnse Boileau e Sesel i kontinnyen bouze an sersan sa ki touzour meyer pour bann zabitan.
Koman en manm Lasanble, ler mon ganny elekte mon pou travay san ses pour ede realiz laspirasyon zabitan mon distrik e pouse ki bann proze merite dan distrik i ganny realize. Apre tou Anse Boileau i distrik kot mon’n ne, pas tou mon lanfans , ganny mon ledikasyon primer e segonder e plitar travay koman en ansennyan. Mon’n osi ganny sans partisip dan diferan foronm, lokal, rezyonnal e enternasyonnal ki’n ogmant mon konesans dan diferan domenn lavi sirtou bann konteks sosyal. Alors i mon devwar ozordi pour partaz avek kominote mon lentelizans, lekperyans e dezir pour kree sa nouvo Anse Boileau.
Politik modern i an gran parti konpri sa laspe ledikasyon. Mon pare pour dedye mon letan e konesans pour travay avek tou bann zabitan, me pli enportan ed bann zenndevelop sa lespri patriotizm, apresye e sezi tou bann loportinite ki a zot laporte pour zot devlopman personnel e profesyonnel. Mon rekonnet ki sa langazman i anmenn avek li bokou defi, me dan en lespri dyalog, travay dir e senserite mon konvenki ki mon pou fer en travay formidab pour ki mon distrik, parti e pei an zeneral i kontinnyen bouze. Bann kalite personnel ki mon posede tel ki latolerans, respe e lekout parmi lezot, pou ed mwan realiz sa latas nob. Mon konvenki ki dan en lespri travay dir e konsiltasyon Anse-Boileau pou vin en distrik model kot sak zabitan i kapab aport son kontribisyon pour en lavenir bokou pli briyan e
prosper.
Nou distrik i enn ranpli avek bann fanm e zonm kapab ki annan bokou pour ofer dan en levantay domenn. Si nou tou nou koste ansanm dan en lespri travay lekip nou pou sirman arive konstrir en nouvo Anse Boileau kot i annan plis larmoni, prosperite, progre e kot i pli gou pour viv.
Ki Bondye i kontinnyen beni nou zoli distrik