Baie-Lazare
Mon en zanfan Baie Lazare kot mon’n pas mon lanfans e kot mon’n fer mon ledikasyon Primer ek Segonder. Apre en long parkour mon rev ti vin vre pour mwan kalifye koman en avoka swivan mon letid liniversiter Langleter an 1998. Mon karyer dan politik ti komans menm avan ki mon ti komans mon letid lalwa. Mon ti premye tyermenn ki ti ganny elekte dan eleksyon Konsey Distrik an 1991 ziska ki Konsey Distrik ti aboli.
Apre mon retour Langleter mon pa ti ezite pour mwan reponn lapel Parti e mon distrik e travay pour devlopman e byennetmon pei.An 2007 mon ti ganny demande avek Parti pour reprezant mon distrik dan eleksyon Lasanble Nasyonal e mon ti sorti venker lo mon oponan. Apard reprezantan mon distrik mon ti osi ganny elekte koman Depite Spiker Lasanble Nasyonal, en pozisyon ki mon’n okipe toudilon mon manda.
Pandan mon premye manda i annan bokou ki’n ganny akonplir, parkont mon’n fer fas avek bokou defi fas ek reformekonomik kot in san dout annan en lefe negativ lo resours e sa in afekte devlopman mon distrik kot serten bann proze enportan pa’n kapab demare. Malgre sa mon’n pouse dan en tel lanvironnman kot Baie Lazare in bouze a tou nivo.
Mon posed bokou leksperyans ek matirite politik mon pe demann zabitan Baie Lazare pour donn mwan en lot manda akoz mon krwar travay in komanse i bezwen konplete, akoz lanvironnman ekonomik diran mon premye manda pa’n permet mwan akonplir mon laspirasyon. Mon senserman krwar ki i ankor annan bokou pour mwan ofer mon distrik. La ki distrik pe al ganny plis lotonomi, i pran lo nivo distrik e permet partisipasyon plis zabitan dan desizyon ki distrik pour pran a lavenir.
Mon vizyon pour mon distrik, se vwar en Baie-Lazare vibran, ranpli avek bokou transformasyon e byen plase dan vizyon Prezidan Michel lo semen sa Nouvo Sesel ki garanti sakenn de nou ek nou kominote progre ek prosperite. Avek sa leksperyans ek abilite mon vwar mwan dan en pozisyon eksepsyonnel koman Kandida Parti Lepep ki pou selman kapab garanti ou partisipasyon e akse a tou bann benefis ki sa nouvo Sesel pe ofer. Se sa mon laspirasyon e sa nouvo langazman pour tou zabitan Baie Lazare. Kontinyite i sel mwayen pour anmenn plis progre