Plaisance
Mon’n deside pour reprezant avek lafyerte e konviksyon, mon distrik, Plaisance koman Manm Parlman. Lafyerte akoz mon’n ne e grandi Plaisance, konviksyon akoz mon’n devlop en lentere koman en serviter lepep, mon’n partaz e okouran defi mon bann frer ser zabitan e alors mon konvenki ki mon annan bokou pour ede anver anmenn en diferans e kree en lenpakt pozitiv dan mon kominote an zeneral. Mon en endividi ki devoue dan sa ki mon fer, mon lwayal anver mon distrik e pei dan botan e movetan, savedir mon pa zanmen denigre mon patri dan sirkonstans difisil. Lo sa not mon bann frer ser zabitan, zot ava agree avek mwan ki lavi pa sitan fasil e i ranpli avek diferan defi, mon pou fer mon mye koman zot reprezantan e fasilitater anver zot diferan konsern, fo promes pa’n zanmen mon stil travay avek nou zabitan.
Tou mon lavi mon’n grandi e lekol dan distrik Plaisance e mon konn an gran poursantaz mon bann frer, ser zabitan. I mon devwar pour entegre e pas plis mon letan pour mye konn zot tou, konpran zot sitiasyon lavi, sirkonstans sosyal e devlop sa relasyon mityel otan ki posib e aport soutyen pour sa minorite ki pour en rezon ou en lot pe trimouse pour fer de bout zwenn diran lemwan. Parmimon vizyon, se fer ki saminorite ki dezavantazye ouswa pe fer fas avek defi sosyal realiz lenportans travay dir e devlop en lapresiasyon avek sa ki zot annan e sers bann fason ki pou amelyor zot lavi. De lot kote, rod soutyen e esey fer sa mazorite ki pe viv en lavi konfortab e pe zouir en biznes rantab realiz sa laspe responsabilite sosyal e pran konsiderasyon nou bann frer, ser ki pa sitan sanse pour zouir en tel konfor e ki dan sirkonstans difisil. Andot mo, zet en koudey lo zot e ede dan bann progranm devlopman e amelyorasyon zot lavi, san oubliy byensir zot prob devlopman kontinyel e soutenab. Sa i ava an retour ede anmenn plis larmoni dan nou kominote.
Mon konsider mon lekor sanse ki mon pa’n grandi dan en fanmiy ki ti dan botan, mon konnen avek lafyerte ki savedir sakrifis en fanmiy, e ozordi in fermwan devlop sa sans apresye sa ki mon annan. Se sa valer ki mon anvi enkilke dan mon kominote, sa sans lapresiasyon, kontant ek sa ki nou annan, respe e responsabilite sivik, sa lespri leve debrouye pour reisir dan lavi. Diran mon letan dan servis piblik, espesyalman koman Ladministratris Distrik Plaisance, mon’n kapab mye konpran parfwa sirkonstans e difikilte pour fer pase serten lopinyon ou demann piblik, mon pou fer mon mye posib pour esey fer debousman zot demann otan ki mon kapab. Lo size lafanmiy sirtou bann paranmwayenn-az, zot annan en rol mazer pour zwe dan devlopman e ledikasyon zot zanfan san oubliy kominote.
I mon swe osi parey pour zot ki zanfan nou distrik i grandi dan en lanvironnman ki prop kont bann fleo sosyal e bandisite, ki zanfan nou distrik i reisir an term ledikasyon e demen ganny en lanplwa. Mon konpran ki avek zot diferan komitman e responsabilite i pa fasil pou vwar zot aktiv dan devlopman distrik, me toudmenm mon pou a la resers zot partisipasyon otan ki posib. Mon bann koleg lazenes, lavenir i dan zot lanmen e loportinite i a zot dispozisyon, regard pli lwen posib dan lavi e travay dir anver realizasyon zot gol. Ansanm, nou ava fer fas kont bann diferan negativite e move pratik anti-sosyal ki met baryer dan zot devlopman personnel. Mon bann frer ser twazyenm az, zot bann ero nou kominote e respe kimon annan anver zot i enorm, mon pou a zot dispozisyon otan ki posib koman en fasilitater pour ki zot kontinyen zouir zot retret dan konfor, serenite e osi kontinyen angaz zot dan devlopman e aktivite sosyal e kiltirel distrik.
Sa paragraf an zeneral i demontre ki Roma tousel, mon pa pou reisir, I en lapel alors ki mon pe lanse avek tou zabitan Plaisance ki nou distrik i bezwen nou, ki lafors i fer linyon e mon determinen pour reprezant zot e travay ansanm avek zot pour byennet nou kominote e prosperite nou zabitan. Avek lagras Bondye, mon pe regard en fitir briyan pour nou Distrik e Sesel. Avek tou senserite, antraver zot sipor, mon pou fer li mon devwar ki mon servis pou a la porte zot tou, san leksepsyon, e i pou en loner ineksplikab pour reprezant mon kominote.Mon’n plis ki pare pour deservi zot e anmenn Plaisance lo en lot letap